▪️ Editor - Sanjay Kannawar ▪️ Mobile - 9158399455 ▪️ RNI No. MAHMAR/2011/37424/

तेलंगणा राज्यातील दवाखाने चंद्रपुर जिल्ह्यातील रुग्णांना देण्याच्या मागणीला प्रशासनाने दर्शविली तयारी! मुनगंटीवार यांनी केली होती आरोग्य मंत्र्याकडे मागणी



चंद्रपूर प्रतिनिधी :- जिल्‍हयातील वाढती कोरोना रूग्‍ण संख्‍या व वाढता मृत्‍युदर लक्षात घेता ज्‍या आरोग्‍य विषयक समस्‍या निर्माण झाल्‍या आहेत त्‍यावर मात करण्‍यासाठी शेजारच्‍या तेलंगणा राज्‍यातील आसिफाबाद, करिमनगर आणि आदिलाबाद या ठिकाणचे हॉस्‍पीटल्‍स चंद्रपूर जिल्‍हयातील रूग्‍णांसाठी उपलब्‍ध करण्‍याच्‍या दृष्‍टीने सार्वजनिक आरोग्‍य मंत्री राजेश टोपे यांनी तेलंगणा सरकारशी चर्चा करावी अशी मागणी नुकतीच विधिमंडळ लोकलेखा समितीचे प्रमुख तथा माजी वित्‍तमंत्री आ. सुधीर मुनगंटीवार यांनी केली. चंद्रपूर जिल्‍हयात कोरोना रूग्‍णांची संख्‍या वेगाने वाढत आहे. या ठिकाणी सा-या व्‍यवस्‍था कोलमडुन गेल्‍या आहेत. इंजेक्‍शन्‍स मिळत नसुन आवश्‍यक इंजेक्‍शन्‍सची टंचाई निर्माण झाली आहे. बेडस् उपलब्‍ध नाही, पेशंटना दवाखान्‍याबाहेर चोवीस – चोवीस तास बाहेर उभे राहावे लागत आहे, खाजगी दवाखान्‍यांमध्‍ये सुध्‍दा बेडस् उपलब्ध नाही. एकुणच चिंताजनक अवस्‍था निर्माण झाली आहे. मृत्‍युदर वाढत चालला असुन जिल्‍हा प्रशासन व आरोग्‍य विभागाचे याकडे दुर्लक्ष होत आहे.
तेलंगणात कोरोना रूग्णसंख्या कमी असल्यामुळे तेलंगणातील आसिफाबाद, करिमनगर आणि आदिलाबाद येथील हॉस्पीटल्स चंद्रपूर जिल्ह्यातील रूग्णांसाठी उपलब्ध होण्याच्या दृष्टीने पुढाकार घेण्याची मागणी लोकलेखा समितीचे अध्यक्ष आ. सुधीर मुनगंटीवार यांनी आरोग्यमंत्री राजेश टोपे यांच्याकडे केली होती. त्या अनुषंगाने कोविड-१९ वर मात करण्याच्या उद्देशाने तेलंगणातील आरोग्य सुविधा, कोविड रूग्णालय, ऑक्सिजन प्लान्ट व अन्य सुविधांविषयी माहिती काढण्याचे निर्देश जिल्हा प्रशासनाने संबंधित यंत्रणेला दिले असल्याची माहिती आहे. महत्वाचे म्हणजे चंद्रपूरपासून अवघ्या काही अंतरावर असलेल्या तेलंगणामध्ये रूग्णसंख्या कमी आहे, त्या राज्याच्या आरोग्य सुविधांचा लाभ जिल्ह्याला मिळाव्या, अशी मागणी आम. मुनगंटीवार यांनी केली होती, जिल्हा प्रशासन यासंबंधात "अॅक्शन मोड"वर आल्याचे चित्र दिसत आहे.
शेजारच्‍या तेलंगणा राज्‍यात चंद्रपूरहून 65 किमीवर आसिफाबाद, 110 किमी अंतरावर आदिलाबाद व 150 किमी अंतरावर करिमनगर ही जिल्‍हा मुख्‍यालय आहेत. याठिकाणी रूग्‍णसंख्‍या अतिशय कमी असल्‍यामुळे सदर हॉस्‍पीटलमध्‍ये मोठया प्रमाणावर बेडस् उपलब्‍ध आहेत, डॉक्‍टर्स व आरोग्‍य कर्मचारी उपलब्‍ध आहेत. ऑक्‍सीजनची पाईपलाईन उपलब्‍ध आहे, रेमिडीसीवीर इंजेक्‍श्‍न वगळता अन्‍य सर्व आरोग्‍य सुविधा या ठिकाणी उपलब्‍ध आहे. याठिकाणचे हॉस्‍पीटल्‍स चंद्रपूर जिल्‍हयातील रूग्‍णांसाठी उपलब्‍ध झाल्‍यास कोरोना आटोक्‍यात येण्‍यास मोठी मदत होईल. यासंदर्भात तेलंगणाचे वित्‍तमंत्री श्री. हरीश राव यांचेशी मी चर्चा केली असुन महाराष्‍ट्र सरकारकडुन याबाबत प्रस्‍ताव प्राप्‍त झाल्‍यास सकारात्‍मक कार्यवाही करण्‍याबाबत त्‍यांनी आश्‍वस्‍त केले आहे. तिन महीन्‍यांपुर्वी 36 रूग्‍णवाहीका चंद्रपूर जिल्‍हयासाठी विकत घेतल्‍या आहेत. त्‍यामाध्‍यमातुन किंवा वातानुकुलीत बसेसच्‍या माध्‍यमातुन रूग्‍णांना त्‍याठिकाणी पाठविता येवू शकेल. याद़ष्‍टीने नियमातील तरतुदी तपासुन तेलंगणा सरकारशी सामंजस्‍य करार करावा व या राज्‍यातील करिमनगर, आसिफाबाद व आदिलाबाद येथील हॉस्‍पीटल चंद्रपूर जिल्‍हयासाठी उपलब्‍ध करावे, अशी मागणी आ. सुधीर मुनगंटीवार यांनी सार्वजनिक आरोग्‍यमंत्री राजेश टोपे यांच्‍याकडे केली होती या मागणीवर जिल्हा प्रशासनाने सकारात्मक पाऊले उचलण्यास सुरुवात केली असल्याचे चित्र दिसत आहे.
रेमडेसेविर इंजेक्शन वगळता उपलब्ध खाटा, डॉक्टर्स, आरोग्य कर्मचारी, ऑक्सिजन पाईपलाईन व सर्व पायाभूत आरोग्य सुविधा तेलंगणा राज्य मध्ये उपलब्ध आहेत. या ठिकाणी रुग्णांची संख्या ही अत्यंत कमी आहे या दृष्टीने नियमातील तरतुदी तपासून महाराष्ट्र सरकारने तेलंगणा सरकारची सामंजस्य करार करावा याकडेही लोकलेखा समितीचे प्रमुख आ. मुनगंटीवार यांनी लक्ष वेधले.